حەمەی حەمەسەعید، وەزیری رۆشنبیری و لاوانی حکومەتی هەرێمی کوردستان، لە نووسینگەی خۆی لە شاری سلێمانی پێشوازی لە شاندێکی رێکخراوی نێردە بۆ دیپلۆماسی و پەیوەندییە گشتییەکان کرد.
لە دیدارێکدا، شاندەکە باسیان لە ئامانج و چالاکییەکانی رێکخراوەکەیان لە پێناو برەودانی زیاتر بە کاری دیپلۆماسی و پەیوەندییە گشتییەکان و چارەسەرکردنی کێشەکان لە رێگەی ئاشتیی و گفتوگۆوە کرد.
لەو چوارچێوەیەدا، وەزیری رۆشنبیری و لاوان ستایشی هەوڵ و ماندووبوونی رێکخراوەکەی کرد و هیوای خواست هەرچی زیاترە پەرە بە کاری رێکخراوەیی بۆ خزمەتی ئاییندەی کۆمەڵگەی هەرێمی کوردستان بدرێت و بایەخی پتر بە کاری دیپلۆماسی لە ژیانی حزبی و سیاسیی و پەیوەندییە گشتییەکان لە دامەزراوە حکومی و ناحکومییەکان بدرێت بۆ رەخساندنی لێکتێگەیشتن و چارەسەری کێشەکان.