عەلی لاریجانی، سکرتێری ئەنجوومەنی باڵای ئاسایشی نیشتمانیی ئێران،١٤ی ئابی ٢٠٢٤، لە میانی سەردانەکەیدا بۆ لوبنان پەیامێکی لە تۆڕی کۆمەڵایەتیی ئێکس بڵاوکردەوە و کاردانەوەی بەرفراوانی لە گۆڕەپانی سیاسی و کۆمەڵایەتیی لوبناندا لێکەوتەوە. پەیامەکە کە بە زمانی عەرەبی و شێوەزاری لوبنانی نووسرابوو، لەلایەن بەکارهێنەرانی لوبنانییەوە ڕووبەڕووی ڕەخنەیەکی زۆر بووەوە و بە پەیامێکی گاڵتەجاڕانە ناویان برد.
لاریجانی لە پەیامەکەیدا نووسیبووی: “دەستێوەردان لە کاروباری لوبنان؟! من بەرپرسی ئاسایشی نیشتمانیی ئێرانم و بە ڕاشکاوی دەیڵێم: ئێران هیچ نیازێکی نییە دەست لە کاروباری هیچ وڵاتێک وەربدات، لوبنانیش یەکێکە لەوان… ئەوەی دەست لە کاروباری لوبنان وەردەدات، ئەو کەسەیە کە لە هەزاران کیلۆمەتر دوورترەوە بەرنامە و خشتەی کاتیتان بۆ دەنێرێت. ئێمە هیچ بەرنامەیەکمان پێنەداون!”
ئەم گوتانە، کە وەک ئاماژەیەک بۆ سندێکی ئەمریکا و نێردە تایبەتەکەی ئەو وڵاتە لێکدرایەوە، لەلایەن هەندێکەوە بە سووکایەتیکردن بە “سەروەری و سەربەخۆیی لوبنان” هەژمار کرا.
لە کاردانەوەیەکدا، یوسف ڕەجی، وەزیری دەرەوەی لوبنان، لەبارەی دیداری لەگەڵ لاریجانی گوتی: “تەنانەت ئەگەر کاتیشم هەبووایە، پێشوازیم لێ نەدەکرد.” ئەم هەڵوێستە لە تۆڕە کۆمەڵایەتییەکاندا دەنگدانەوەی فراوانی هەبوو.
لای خۆشیانەوە، ڕیشارد قیومجیان، وەزیری پێشووتری کاروباری کۆمەڵایەتیی لوبنان، لاریجانیی بە “میوانێکی بانگهێشتنەکراو” ناوبرد و مارک زەو، ئەندامی پەرلەمانی لوبنان گوتی: “باشترین کار لاریجانی دەتوانێت بیکات ئەوەیە چەکە ئێرانییەکان لەگەڵ خۆی بباتەوە.”
