ئاریانا گراندێ، گۆرانیبێژی جیهانی، لە میانی بەشداریکردنی لە پۆدکاستی (Good Hang) ڕایگەیاند کە ئەو گەشتە هونەرییەی بڕیارە لە ساڵی ٢٠٢٦ ئەنجامی بدات، ڕەنگە ببێتە کۆتا گەشتی گەورەی بۆ ماوەیەکی زۆر دوور و درێژ. ناوبراو ئاماژەی بەوە کرد کە دەخوازێت بچێتە قۆناغێکی هێمنترەوە کە لەگەڵ دۆخی ئێستای ژیانیدا بگونجێت.
گراندێ تەمەن ٣٢ ساڵ گوتی: “هەست دەکەم ١٠ بۆ ١٥ ساڵی ڕابردووم زۆر جیاواز دەبن لە ساڵانی داهاتووم. من بە پەرۆشم بۆ گەشتە بچووکەکەی داهاتووم، بەڵام ئەگەری هەیە بۆ ماوەیەکی زۆر نەگەڕێمەوە بۆ گەشتە جیهانییە گەورەکان”.
ئەوەشی خستەڕوو، ئێستا زیاتر حەزی بە نواندن و شانۆیە، بەتایبەتی شانۆی برۆدوەی کە سەرەتای دەرکەوتنی بووە. ئەم بڕیارەش دوای سەرکەوتنە گەورەکانی دێت لە ئەلبوومی “Eternal Sunshine” و بەشداریکردنی لە فیلمی “Wicked”.