حکوومەتی ئێران ڕایگەیاند زیانەکانی لێکەوتەی هێرشەکانی ئەمریکا و ئیسرائیل بۆ سەر ئەم وڵاتە دەگاتە نزیکەی “٢٣٠ ملیار یۆرۆ”.
فاتیمە موهاجەرانی گوتەبێژی حکوومەت، بە ئاژانسی هەواڵی دەوڵەتیی ڕووسیای گوت ئەم ژمارەیە خەمڵاندنێکی سەرەتاییە.
موهاجەرانی گوتی: بۆ هەڵسەنگاندنی تەواو، سەرەتا دەبێت زیانە بەرکەوتووەکانی سەر باڵەخانەکان بپشکنرێن و پاشان زیانە ئابوورییەکان و کەمبوونەوەی داهاتە باجییەکان هەژمار دەکرێن.
بە گوتەی موهاجەرانی، حکوومەتی ئێران بەتەمایە لە دانوستانەکان لەگەڵ ویلایەتە یەکگرتووەکاندا، پرسی وەرگرتنی قەرەبوو بخاتە ڕوو.
گوتەبێژی حکومەتی ئێران هەر وەها گوتی: پێدانی قەرەبوو پێشتریش لە بەرنامەی کاری دانوستانەکاندا بوو، بەڵام ئەو خولەی گفتوگۆکان بەبێ گەیشتن بە ڕێککەوتن کۆتایی هات.
