دەستەی کەشناسیی عێراق، ئەمڕۆ پێشبینییەکانی بۆ کەشوهەوای مانگەکانی داهاتوو ڕاگەیاند و جەختی کردەوە کە هاوینی ئەمساڵ زۆر گەرم دەبێت و لە هەندێک ناوچە پلەکانی گەرما دەگەنە سەروو ٥٠ پلەی سەدی.
عامر جابری، بەڕێوەبەری ڕاگەیاندنی کەشناسیی عێراق ڕاگەییاند: “هاوینی عێراق بەوە ناسراوە کە زۆر گەرمە، بەتایبەت لە مانگەکانی حوزەیران، تەمموز و ئابدا، کە تێیدا پلەکانی گەرما لە ناوچەکانی ناوەڕاست و باشوور ٥٠ پلە یان زیاتر دەبن”. ئاماژەی بەوەش کرد کە گۆڕانکارییەکانی کەشوهەوا، کەمبوونەوەی ڕووبەری سەوزایی و پشتێنەی سەوز، لەگەڵ وشکبوونی سەرچاوە ئاوییەکان، هۆکاری سەرەکین بۆ توندتربوونی شەپۆلەکانی گەرما.
سەبارەت بە چەند ڕۆژی داهاتوو، جابری وتی: “کەشوهەوا تا کۆتایی هەفتە ئاسایی دەبێت و پلەکانی گەرما وردە وردە بەرز دەبنەوە، لەگەڵ ئەگەری تۆز و خۆڵێکی کەم لە باشوور و بارانێکی کەم لە ناوچە شاخاوییەکانی باکوور”. هەروەها ئاماژەی بەوە کرد کە دەستەکە سوود لە تەکنەلۆژیای نوێ و ژیریی دەستکرد (AI) وەردەگرێت بۆ پێشبینیکردنی کەشوهەوا، بەڵام پێویستیان بە پەرەپێدانی زیاتری وێستگەکان هەیە بۆ ئەوەی لەگەڵ گۆڕانکارییە جیهانییەکاندا بگونجێن.