عەلی بەحرەینی، باڵیۆز و نوێنەری هەمیشەییی ئێران لە نووسینگەی نەتەوە یەکگرتووەکان لە جنێڤ، پێشکەوتنی “زۆر باش”ی لە دانوستانەکانی نێوان ئێران و ئەمریکا ڕاگەیاند. ناوبراو ئاماژەی بەوە کرد گفتوگۆ تەکنیکییەکانی نێوان هەردوولا بەردەوامن.
بەحرەینی ڕۆژی سێشەممە بە ڕۆژنامەنووسانی گوت: “لە ڕۆژانی داهاتوودا دوو گرووپی کار بۆ لێکۆڵینەوە لە پرسی لادانی سزاکان و چالاکییە ئەتۆمییەکان پێک دەهێنرێن.” ئێران و ئەمریکا لە دانوستانەکانی سویسرا لەسەر نەخشەڕێگەیەک بۆ گەیشتن بە ڕێککەوتنی کۆتایی لە ماوەی ٦٠ ڕۆژدا ڕێک کەوتوون.
هەروەها نوێنەرەکەی ئێران لێدوانەکانی جی-دی ڤانس، جێگری سەرۆکی ئەمریکای دەربارەی چۆنیەتیی خەرجکردنی دارایییە بلۆکەکراوەکانی ئێران ڕەت کردەوە و گوتی: “تەنیا ئێران بڕیار لەسەر چۆنیەتیی بەکارهێنانی دارایییە ئازادکراوەکانی خۆی دەدات.” چاوەڕوان دەکرێت بە گوێرەی ڕێککەوتنە سەرەتایییەکان، نزیکەی ١٢ ملیار دۆلار لەو دارایییانە ئازاد بکرێن.
هەواڵی پێشوو