محەممەد شیاع سوودانی، سەرۆکوەزیرانی عێراق و عەلی زەیدی، سەرۆکوەزیرانی ڕاسپێردراو کۆبوونەوە؛ پرسی پێکهێنانی کابینەی نوێی حکومەت و دوایین پەرەسەندنە سیاسییەکان تەوەرە سەرەکییەکانی گفتوگۆکانیان بوو.
بەپێی ڕاگەیێندراوێکی نووسینگەی سەرۆکوەزیرانی عێراق، ئەمڕۆ ، محەممەد شیاع سوودانی پێشوازی لە عەلی زەیدی، سەرۆکوەزیرانی ڕاسپێردراو کرد. لە دیدارەکەدا بارودۆخی سیاسیی وڵات و هەنگاوەکانی پەیوەست بە تەواوکردنی ڕێکارە دەستوورییەکان بۆ پێکهێنانی حکومەتی داهاتوو تاوتوێ کران.
لە ڕاگەیێندراوەکەدا هاتووە، هەردوولا جەختیان لەسەر گرنگیی خێراکردن لە پێکهێنانی کابینەیەک کردووەتەوە کە بتوانێت ڕووبەڕووی تەحەددییەکان ببێتەوە و داواکارییەکانی هاووڵاتییان جێبەجێ بکات.
هەر لەو کۆبوونەوەیەدا، باس لە هەماهەنگیی نێوان هێزە سیاسییەکان کراوە بۆ پشتگیریکردن لە بەرنامەی نیشتمانیی حکومەتی داهاتوو، بە ئاراستەی سەقامگیریی سیاسی و ئابووری لە وڵاتدا.
ئەم دیدارە لەکاتێکدایە، لایەنە سیاسییەکان لە هەوڵە بەردەوامەکانیاندایە بۆ گەیشتن بە ڕێککەوتنی کۆتایی لەسەر دابەشکردنی پۆستە وەزارییەکان و دیاریکردنی کاتی دانیشتنی پەرلەمان بۆ متمانەدان بە کابینە نوێیەکەی عەلی زەیدی.