هەواڵەکان باس لەوە دەکەن کە دوای چەند ڕۆژێک لە دەستگیرکردنی محەمەد باقر السعدی، ئەندامی کتائب حیزب‌اللەی عێراق لە تورکیا بە دەستی هێزەکانی ئەمریکا، سەرچاوەیەکی ئاگادار ئاشکرا کردووە کە ئیڤانکا ترامپ، کچی سەرۆکی ئەمریکا دونالد ترامپ، ئامانجی پلانی کوشتن بووە.
بەپێی ئەو سەرچاوانە، السعدی کە تەمەنی ٣٢ ساڵە، پەیمانی داوە بە سپای پاسدارانى ئێران بۆ کوشتنی ئیڤانکا ترامپ، هەروەها نەخشەی ماڵەکەی لە ویلایەتی فلۆریدا لەگەڵ خۆی هەبووە. ڕۆژنامەی نیویۆرک پۆست ئەم زانیارییانەی بڵاو کردووەتەوە.
هەروەها وتراوە کە ئەو فەرماندەیەی کتائب حیزب‌الله هەوڵی داوە خێزانی ترامپ ببێتە ئامانج، وەک وەڵامێک بە کوشتنی قاسم سلێمانی، فەرماندەی هێزی قودسی ئێران، کە شەش ساڵ پێش ئێستا لە هێرشێکی فرۆکەی بێ‌فڕۆکەوانی ئەمریکیدا لە بەغدا کوژرا.
لە هەمان بارەوە، ئینتفاض قەنبەر، جێگری پێشووی هاوپەیمانی سەربازیی باڵیۆزخانەی عێراق لە واشنتن، بە نیویۆرک پۆست وتووە:
“دوای کوشتنی سلێمانی، السعدی بە دەوروبەرییەکانی دەگوت پێویستە ئیڤانکا بکوژرێت و ماڵی ترامپ بسوتێندرێت، وەک ئەوەی ئەو ماڵەکانی ئێمەی سوتاند.”
قەنبەر هەروەها ئاماژەی بەوە دا کە “بیستوومانە السعدی نەخشەی ماڵی ئیڤانکا لە فلۆریدا لەگەڵ بووە.” سەرچاوەیەکی دیکەش پلانی کوشتنی ئیڤانکای پشتڕاست کردووەتەوە.